धनगढीः धनगढी उपमहानगरपालिकाले लगातार तेस्रो वर्ष अपाङ्गता भएका व्यक्तिहरूलाई खोजीखोजी सहायता सामग्री वितरण गरेको छ ।
आर्थिक वर्ष २०७९÷८० मा सुरू गरिएको निःशुल्क सहायता सामग्री वितरण कार्यक्रमले २०८१÷८२ मा पनि निरन्तरता पाएको उपमहानगरले जनाएको छ ।
धनगढी उपमहानगरपालिकाले पाँच क्लस्टरमा विभाजन गरी मंसिर २३ देखि २७ गतेसम्म स्क्यानिङ क्याम्प सञ्चालन गरेको थियो । स्क्यानिङ क्याम्प क्रमशः वडा नम्बर १४ फूलबारी, वडा नम्बर १५ उर्मा, वडा नम्बर ९ सहित जुगेडा क्लस्टर, वडा नम्बर ६, ११ र १३ मा सञ्चालन भएको थियो ।
मंसिर २७ गते उपमहानगरपालिकाको प्राङ्गणमै अन्तिम क्याम्प गरिएको थियो । उक्त स्क्यानिङ क्याम्पमा १४३ जना सहभागी भएका थिए । जसमध्ये १२२ जनालाई सहायता सामग्रीका लागि स्क्यानिङ गरी विवरण संकलन गरिएको छ ।
उपमहानगरका अनुसार स्क्यानिङपछि आवश्यक विवरणका आधारमा उनीहरूलाई सामग्री वितरण गरिएको छ । आर्थिक वर्ष २०७९÷८० मा १५० जना र २०८०÷८१ मा २१६ जना अपाङ्गता भएका व्यक्तिहरूलाई सहायता सामग्री वितरण गरिएको छ ।
तीन वर्षमा जम्मा ४८८ जनालाई निःशुल्क अपाङ्गता सहायता सामग्री वितरण गरिएको धनगढी उपमहानगरपालिकाले जनाएको छ । उपमहानगरले अपाङ्गता भएका व्यक्तिहरूलाई दैनिक जीवन सहज बनाउनका लागि यो कार्यक्रम निरन्तर सञ्चालन गर्दै आएको छ ।
