धनगढी : उपप्रधानमन्त्री तथा शहरी विकास मन्त्री प्रकाशमान सिहले संविधान संसोधन गरेर जनताका अधिकार संकुचित पार्न खोजिएको हो–हल्ला फैलाईएको बताएका छन । धनगढी उपमहानगरपालिकाको १० औं स्थापना दिवश समारोहलाई सम्बोधन गर्दै उपप्रधानमन्त्री सिहले यस्तो बताएका हुन ।
‘नेपालमा अस्थिरता भयो, सरकारहरु टिक्ने खालका भएनन । जनतामा अस्थिरताका कारण निरासा छायो भनेर नै ‘पार्लियामेन्ट’का पहिलो र दोस्रो पार्टी मिलेर सरकार बनाएका हुन । यो सरकारले स्थाईत्व ल्याउछ । तर अहिले सरकारको आलोचनाका लागि केही पक्ष लागिपरेका छन’ उनले भने ।
उनले अहिले देखिएका केही अप्ठेराहरु, संविधान संसोधन गरेर सहज पार्नकै लागि यो गठबन्धन बनेको बताए । ‘हामीले संविधान जारी गरेको एक दशक हुनलागेको छ । त्यो दशकमा केही अप्ठेराहरु देखिएका छन । ती अप्ठेराहरुलाई सहज पार्नका लागि एमाले र काँग्रेसका बीचमा ७ बँदे सहमति भएर सरकार बनेको सबैलाई थाहा नै छ’ उनले भने ।
उपप्रधानमन्त्री सिहले आमाले जन्माएको बच्चालाई कहिले पनि घात नगरे झैं नेपाली काँग्रेस आफैले जारी गरेको संविधानमा संसोधन गरेर जनतालाई घात नगर्ने बताउदै आम जनतालाई ढुक्क हुन आग्रह गरे । ‘काँग्रेस एमाले माओवादी सबै मिलेर संविधान बनेको हो नी । अझ नेपाली काँग्रेसका नेता शुसील कोईरालाको नेतृत्वमा नै संविधान जारी भएको सबैलाई थाहा नै छ । जसरी आमाले आफैले जन्माएको बच्चालाई घात गर्दैन, त्यसैगरी नेपाली काँग्रेस आफैले जारी गरेको संविधानमा जनताका अधिकार कुठित हुने गरी संसोधन गर्दैन, म ढुक्क हुन आग्रह गर्दछु’ सिहले भने ।
उनले धनगढी उपमहानगरपालिकाले आयोजना गरेको भब्य १० औं स्थापना दिवशको प्रशंसा गरे । ‘धनगढीमा भईरहेको विकास बारे एउटा डकुमेन्ट्रिीमा हेरे । मलाई ४० वर्ष अघिको धनगढी र अहिलेको धनगढी याद आईरहेको छ । धनगढीले एउटा राम्रो मेयर पाएको छ । म सबै नगरबासीलाई शुभकामना दिन चाहन्छु’ उपप्रधानमन्त्री सिहले भने ।
धनगढी उपमहानगरपालिकाले आफुले गरेका कार्यको डकुमेन्ट्री प्रदर्शन गरेको थियो । कार्यक्रममा धनगढीका मेयर गोपाल हमालले आगन्तुकलाई स्वागत गरेका थिए भने उपमेयर कन्दकला रानाले स्थापना दिवशमा सहभागि सबैलाई धन्यवाद दिएकी थिईन ।
उपमहानगरपालिकाले राम्रो काम गर्ने कर्मचारी, राम्रो नजिता ल्याएका विद्यार्थी, शिक्षकहरुलाई पुरस्कृत पनि गरेको छ ।
