धनगढी ः मदिरा खाएर अर्काको घरमा पसेका एक जनाको कुटपिट पछि ज्यान गएको छ । धनगढी उपमहानगरपालिका वडा नम्बर ८ को धनगढी गाउँमा सोमबार राति ३५ वर्षीय महेश रानाको कुटपिट पछि ज्यान गएको हो ।
जिल्ला प्रहरी कार्यालयका प्रवक्ता प्रहरी नाउव उपरिक्षक कुलदीप चन्दले सोमबार राति स्थानीय मीनबहादुर चौधरीको घरमा प्रवेश गरेका बेला उनीमाथि कुटपिट भएको बताए । कुटपिटबाट गम्भीर घाइते भएका चौधरीको सेती प्रादेशिक अस्पतालमा उपचारका क्रममा ज्यान गएको डिएसपी चन्दले बताए । प्रहरीले रानाले मदिरा सेवन गरेर अर्काको घरमा पसेको बताएको छ ।
रानाको हत्या भएको आशंकामा प्रहरीले सोधपुछका लागि चौधरी दम्पत्ती सहितका पाँच जनालाई पक्राउ गरेको छ । पक्राउ पर्नेमा मीनबहादुर चौधरी, उनकी पत्नी पुनम चौधरी, छोरी सहित ५ जना रहेको प्रहरीले जनाएको छ ।
मृतक राना र उनीमाथि कुटपिट गर्ने चौधरी दम्पत्ती छिमेकी समेत हुन् । राना चौधरी घरभित्र प्रवेश गरेका बेला उनीमाथि कुटपिट भएको थियो । स्थानीयले सम्झाइबुझाई गरेर घर पठाएपनि, राती अवस्था गम्भीर भएपछि रानालाई अस्पताल लगिएको थियो । घटनाबारे थप अनुसन्धान भइरहेको प्रहरीले जनाएको छ ।
