बाजुरा : बाजराको खप्तड छेडेदह गाउँपालिकाले पारित गरेको बजेट विरुद्ध नेपाली काँग्रेसका कार्यकर्ता आन्दोलनमा उत्रिएका छन् । बजेट संसोधन र परिमार्जनको माग सहीत नेपाली काँग्रेस खप्तड छेडेदह गाउँ कार्य समितिले आन्दोलन थालेको हो । करिब ४ करोड बढी रकम अनावश्यक शिर्षकमा विनियोजन गरेको र विकासका योजनामा बेवास्ता गरेको आरोप काँग्रेसको छ ।
खप्तड छेडेदह कार्यपालिकामा काँग्रेसको एकल बहुमत छ । काँग्रेसले विरोध थालेपछि आफू अनुकुल शिर्षकमा रकम विनियोजन नभएको आक्रोशमा आन्दोलन गरिएको आरोप लाग्न थालेको छ । बजेट पारित भएको तीन महिना पछि काँग्रेसले विरोध गरेको हो ।
सिंगो पालिकाले जनताको माग र समाजको आवश्यकता बेगर कार्यक्रममा बजेट विनियोजन गरेको र भौतिक पूर्वाधार विकासमा न्यून प्राथमिकता राखेकोले परिमार्जनको मागगर्दै आन्दोलन थालेको ५ नम्बर वडाका पूर्व अध्यक्ष समेत रहेका काँग्रेस नेता हर्क रावतले बताए ।
आन्दोलनको अगुवाई काँग्रेस गाउँकार्यसमिति सभापति हर्कबहादुर रावतले गरिरहेका छन् । बजेट संसोधनको माग सहीत ज्ञापन पत्र बुझाएपनि सुनुवाई नभएपछि विरोधका कार्यक्रम गर्नु परेको काँग्रेसले बताएको छ ।
पूर्व पालिका अध्यक्ष नरबहादुर रावत, काँग्रेस जिल्ला कार्यसमिति सदस्य कुम्भनाथ योगी, नेताहरु हर्क रावत, खडक बुढा, माओवादीका धनबहादुर रावत सहीतका नेताहरु आन्दोलनमा सहभागि छन् ।
काँग्रेसले अध्यक्ष उपाध्यक्षले आफ्नो नाममा अनावश्यक बजेट छुट्याएको र सस्तो लोकप्रीयता देखाउन खोजेको आरोप लगाएको छ । करिब आधा करोड बजेट अध्यक्ष उपाध्यक्षले नै आफ्नै नामको कार्यक्रम बनाएर छुट्याएकोमा काँग्रेसले आपत्ती छ । ६० लाख रकम छुट्याएर डोजर किन्ने, कर्मचारी र जनप्रतिनिधी भ्रमणकै नाममा ४० लाख बढी बजेट छुट्याउने, एउटै वडामा ३० लाखको मन्दिर निर्माणका लागि बजेट छुट्याउने कुरा संसोधन गरिनु पर्ने माग काँग्रेसको छ ।
पालिकाले भने आवश्यकताको आधारमा र जनताकै पक्षमा काम गर्न सर्वसम्मत बजेट विनियोजन गरेको बताएको छ । रातो किताब ढिलागरि प्रकाशन गरिएको, प्रकाशन पछि पनि लुकाएर राखेको र कार्यपालिका बैठकको निर्णय बेगर योजना समावेश गरिएको दाबी काँग्रेसको छ । तर डोजर लगायतका कुरा आफ्ना कार्यकर्ता काम विहिन हुने र चाहेको काम नपाउने भएपछि विरोध गरिएको काँग्रेस कार्यकर्तामाथि नै आरोप छ ।
७ वटा वडा मध्ये ५ वडा अध्यक्ष र उपाध्यक्ष नेपाली काँग्रेसले जितेको छ । कार्यपालिका सदस्य पनि सिंगो काँग्रेसबाटै निर्वाचित छन् । बजेपछि सर्वसम्मत पारित गरिएको हो । तर बजेट पारितको तीन महिनापछि भने स्वयम काँग्रेसकै कार्यकर्ता आन्दोलनमा उत्रिएका हुन ।
गाउँपालिका अध्यक्ष र २ जना वडाअध्यक्ष नेकपा एमालेबाट प्रतिनिधीत्व गर्छन् । तीन जनाले बहुमत कार्यपालिका भित्र कुनै प्रभावी भूमिमा निर्वाचित भएदेखि खेल्न सकेको देखिदैन् । आफै निर्णय गर्ने, सहमति सहीत पारित गर्ने र अन्तिममा आन्तरिक स्वार्थ मिल्ने योजना नसमेटिएको देखेपछि विरोध गरेको आरोप काँग्रेस कार्यकर्ता माथि छ ।
काँग्रेसबाट जितेकी उपाध्यक्ष बिशुदेवी नाथले भने आफूलाई आन्दोलन बारे जानकारी नभएको बताएकी छन् । ‘ज्ञापन पत्र बुझाएको विषय बारे भने जानकारी छ । त्यो बाहेक थाहा छैन्’ उनले भनिन ।
गाउँपालिका अध्यक्ष दिलबहादुर रावतले भने कार्यपालिका भित्र सहमति गरिएको र सर्वसम्मत निर्णय भएको कुरालाई तीन महिना पछि आएर योजना समावेश नगरिएको बेमौसमी बाजा बजाउनुको कुनै नैतिकता नहुने बताएका छन् । पालिका भित्र पार्टीगत असमझदारी र प्रमुख प्रशासकीय अधिकृत अनुकुल नभएको विषयमा लामो समय देखि विवाद हुदै आएको छ ।
