धनगढी : श्रीमानको विमाको २८ लाख रकम हत्याउनका लागि कञ्चनपुरको बेलौरीकी एक महिलाले भारतीय प्रेमीको योजनामा आफ्नै श्रीमानको हत्या गरेको खुलासा भएको छ । कञ्चनपुरको बेलौरी नगरपालिका–६ भुराकोटकी जनक कुमारी रानाले श्रीमान ४९ वर्षीया सियाराम नाराको ईटाले हानेर हत्या गरेको खुलासा भएको जिल्ला प्रहरी कार्यालय कञ्चनपुरले जनाएको छ ।
जनककुमारीले भारतको खिरी जिल्ला, सम्पूर्णानगरका फारुख नाम गरेका प्रेमीको योजनामा श्रीमानको इटाले प्रहार गरेर हत्या गरेको बयान दिएको जिल्ला प्रहरी कार्यालय कञ्चनपुरका प्रवक्ता डिएसपी उमेशराज जोशीले बताए । रानाको शव २०८१ मङ्सिर १३ गते उनकै घरमा फेला परेको थियो । दोस्रो दिन प्रहरीले श्रीमती जनककुमारीलाई नियन्त्रणमा लिएको थियो । जनककुमारीलाई पूर्पक्षका लागि कारागार पठाइएको कञ्चनपुर प्रहरीले बताएको छ ।
उनका प्रेमी भारतीय नागरिक फारुख पनि २०८१ पुस २८ गते पक्राउ परिसकेका छन । घटनास्थलमा भारतीय नागरिक फारुख नभएपनि बीमाको रकम हत्याउनका लागि दुबै जनाबीच सीयारामको हत्या गर्ने योजना बनेको प्रहरीले जनाएको छ । मृतक सियाराम रानाले नेपाल लाइफ इन्स्योरेन्समा २८ लाखको जीवन बिमा गरेकाले उक्त रकम हत्याउने उद्देश्यले नै उनको हत्या गरिएको प्रहरी अनुसन्धानबाट देखिएको प्रवक्ता जोशीले बताए ।
भारतीय नागरिक फारुखले योजना बनाएपनि हत्या भने आफै गरेको जनककुमारीले प्रहरी समक्ष बयान दिएकी छन । भारतीय नागरिकविरुद्ध कर्तव्य ज्यान मुद्दामा १० दिनको म्याद थपेर अनुसन्धान भइरहेको छ । उनीहरूले रानाको हत्या गरेर शौचालयमा चिप्लिएर रानाको मृत्यु भएको भन्दै प्रहरीलाई खबर गरेका थिए । तर, मृतकको शव शौचालयमा नभएर घरको ग्यालरीको कुनामा सिरकले छोपिएको अवस्थामा भेटिएपछि प्रहरीले अनुसन्धान थालेको हो ।
मृतकको टाउको र तालुमा रहेको चोटका आधारमा प्रहरीले घटनाको अनुसन्धान गरेको थियो । रानाको घर कोठा खानतलासी गर्दा कोठा, कुर्सी, ढोका लगायतका ठाउँमा रगत लागेको भेटिएको थियो । खाटमुनी रगत लागेको इटा भेटिएको थियो ।
दराजमा महिला र पुरुषले लगाउने कपडा रगतले भिजेको अवस्थामा फेला परेका थिए । सोधपुछका क्रममा मृतककी श्रीमती रानाले बिहीबार बिहान दुवै जनाबिच झगडा भएको र दिउँसो सुतेका बेला इटा प्रहार गरि हत्या गरेको स्वीकार गरेपछि उनलाई पक्राउ गरेर मुद्दा चलाइएको हो । श्रीमतीमाथि अनुसन्धान गर्ने क्रममा भारतीयसँग मिलेर हत्या गरेको तथ्य फेला परेको प्रहरीले जनाएको छ ।
