धनगढीः कैलालीको गौरीगंगा नगरपालिकाले मापदण्ड विपरीत नदीजन्य पदार्थको उत्खनन गरिरहेको पाईएको छ । उसले वडा नम्बर ३ मा रहेको शिवगंगा नदीमा डोजर लगाएर नदीजन्य पदार्थ उत्खनन गरिरहेको हो ।
नगरपालिकाले डोजर र से १ ग १२४ र से १ ग १२५ नम्बरको टिप्पर प्रयोग गरेर मापदण्ड विपरीत नदीजन्य पदार्थको दोहन गर्दै आएको छ । वडा नम्बर ३ को कार्यालयले ग्राभेलका लागि महेन्द्र राजमार्गको शिवगंगा पुलदेखि पाँच समय मिटर दक्षिणबाट नदीजन्य पदार्थ उत्खनन् गर्ने काम गर्दै आएको छ ।
वडा नम्बर ३ का सडकहरूमा ग्राभेल गर्न थालिएको वडासदस्यसमेत रहेका स्थानीय हरिराम आर्चायले बताए । उनले भने, ‘वडाका सडकहरूमा ग्राभेल गर्न खनेका हौँ । असार पनि सुरु हुँदैछ । बर्खामा हिलो हुन्छ । हतार–हतारमा काम गर्दैछौ । महेन्द्र राजमार्गबाट पाँच सय मिटर तल खन्न पाउने भनियो । त्यही कारणले मैले नै खन्न भनेको हुँ ।’
संघीय मामिला तथा सामान्य प्रशासन मन्त्रालय अन्तर्गतको वातावरण तथा विपद् व्यवस्थापन शाखाले जिल्ला समन्वय समितिहरू र स्थानीय तहहरूलाई पठाएको मापदण्ड विपरीत गौरीगंगा नगरपालिकाले नदीजन्य पदार्थको दोहन गर्दै आएको छ ।
जिल्ला समन्वय समिति कैलालीका कार्यवाहक प्रमुख खगराज भुषालले गौरीगंगा नगरपालिकाका नगर प्रमुख देविदत्त कडेललाई फोन गरेपछि डोजरसहितका टिप्पर पुलबाट एक किलोमिटर तलको दुरीमा लगिएका छन । नगर प्रमुख कडेलले वडाका जनप्रतिनिधिहरू, डोजरका चालक र टिप्परका चालकहरूलाई मापदण्डको विषयमा जानकारी नभएकाले यस्तो भएको बताए ।
