धनगढी : सेती यातायात ब्यवस्था कार्यालय कैलालीको परिषर, सेतो दाह्री भएका अधबैसे उमेरका दिपेन्द्र बहादुर चन्द असिनपसिन भएर कार्यालय भीत्र पसे । कार्यालयका तीन÷चार कक्षहरुमा उनी छिरे, १५÷२० मिनेटको सोधपुछ पछि उनी निरास भएर बाहिर फर्किदा भेट भयो ।
‘असारको १४ गते मोटरसाईकलको कर तिर्ने समय सकिएको रहेछ, मोटरसाईक नविकरण गरौं भनेर विद्यालयबाट आधा दिनको विदा लिएर आएको तर कर लिनै मानेन’ उनले भने । उनी धनगढी उपमहानरपालिकाको वडा नम्बर १९ मा रहेको शंकर सरस्वती अन्नपूर्ण आधारभूत विद्यालयका शिक्षक रहेछन ।
‘२५ किलोमिटर टाढा बाट आएको, यता आएर पनि मोटरसाईकल नविकरण भएन, बजेट पास नभएकाले कर लिने गरिएको छैन भन्यो, अब सरकारले कर तिर्छु भन्दा पनि नलिने अवस्था आयो । यो सब नेताहरुका कारण त हो नी’ आक्रोसित हुदै शिक्षक चन्द आफ्नो बाटो लागे ।
बझाङको खप्तडछान्ना गाउपालिका वडा नम्बर ३ का जय बहादुर रावल पनि निरास भएर फर्किए । रावलको खप्तड छान्नाका विभिन्न ग्रामीण सडकमा चल्ने बोलेरो जीप (से १ ज ७४३) रहेछ । उनी जीपको रुट पर्मिट (सडक ईजाजत पत्र) बनाउन आएका रहेछन ।
‘डडेल्धुराको यातायात कार्यालयमा गए, एक हप्ता सम्म कर संकलन हुदैन भन्यो । त्यहाँका कर्मचारीले धनगढीमा रहेको यातायातमा गएर केही हुन्छ की भन्ने सल्लाह दिए । त्यहाँबाट धनगढी आए तर यहाँ पनि रोड पर्मिट बनेन’ उनले गुनासो गरे ।
सार्वजनिक सवारी साधनका लागि वर्षमा हरेक चार÷चार महिनामा रुट पर्मिट लिनुपर्छ । कुन रुटमा चलाउने र सवारी साधनको प्रकृती अनुसारको राजश्व तोकिएको हुन्छ ।
‘हरेक चार महिनामा २२ सय रुपैया तिर्नुपर्छ । एक दिन पनि बढी भयो भने त्यसको दोब्बर ४४ सय तिर्नुपर्छ । मेरो गाडीको रुटपर्मिटको अब २ दिन मात्र बाँकी छ । त्यसपछि मैले २२ यको ठाउँमा ४४ सय तिर्नुपर्छ । त्यसपछि पनि हप्ता हप्तामा दोब्बर हुदै जाँन्छ’ उनले गुनासो गरे ।
उनले आफु सरकारलाई बुझाउने राजश्व समयमै तिर्न बझाङबाट आएपनि सरकारले कर नलिएर समस्यामा पारेको गुनासो गरे । ‘अब मैले जरिमाना तिर्नुप¥यो भने त्यसको जिम्मेवार को हुन्छ?’ रावलले प्रश्न गरे । ‘सरकारमा बसेकाहरु निकम्मा भए सर । गरिखानेले पनि गरिखान नपाउने भए ।’
कैलालीकै गोदावरी नगरपालिका २ उत्तरबनखेतका गणेश विकले सोही पालिकाका लोक बहादुर खत्रीबाट मोटरसाईकल किने । उनी शुक्रबार मोटरसाईकल नामसारीका लागि यातायात ब्यवस्था कार्यालय कैलाली पुगे । ‘अहिले हुदैन भन्यो, कहिले हुन्छ भनेर पनि बताएन । खै कति समय लाग्छ हामीलाई नी थाहा हुन्न भन्यो, अन्यौलता पो भयो त सर’ यातायात परिषरमा उनले भने ।
उनलाई राजश्व संकलन किन नभईरहेको भन्ने थाहा समेत थिएन । ‘खै सर सरकारले राजश्व पनि किन लिएन, थाहा भएन । नेताहरुका कारण हो भने । मैले त बुुझेन ।’ विकले भने
धनगढी उपमहानगरपालिका वडा नम्बर १७ पथरीका अमन चौधरीको विहीबार नै मोटरसाईकल नविकरणको अन्तिम समय थियो । शुक्रबार देखि उनी जरिवानामा परिसकेका छन । ‘म राजश्व बुुझाउन त समयमै आएको छु नी, तर मेरो मोटरसाईकलको नविकरण गरिदिएन, मेरो के गल्ती छ । अब जरिवाना लियो भने ठिक हुदैन भनेर आएको छ’ु यातायात ब्यवस्था कार्यालयका कर्मचारीहरु प्रति आक्रोसा पोख्दै अमनले भने ।
यातायात, मालपोत र स्थानीय तहहरुका कर्मचारी पनि राजश्व बुुझाउन सेवाग्राही आउने र राजश्व नलिएर फर्काउनु परेपछि खिन्न भएका छन । ‘सेवाग्राही आउछन, राजश्व बुुझिदिन भन्छन, बजेट पास भएको छैन । करका दरहरु परिवर्तन भएका छन । कसरी कुन आधारमा कर लिनु ? सेवाग्राही फर्काउदा हामीलाई पनि पिडा भईरहेको छ’ यातायात ब्यवस्था कार्यालय कैलालीका अधिकृत श्याम प्रसाद जोशीले भने ।
कतिपय सेवाग्राहीहरुले कर्मचारीहरुलाई गाली गर्ने र झगडा पनि गर्ने गरेका छन । ‘कतिपय सेवाग्राहीको नविकरणको अन्तिम समय हुन्छ, नविकरण गर्नेहरु समय सकिने लागेका बेला मात्रै आउने त हुन नी, तर राजश्व लिन नपाउदा, उनीहरु जरिवानामा पर्ने भएका छन’ अधिकृत जोशीले भने । ‘सरकारले यस अवधीको जरिवाना मिनाहाको ब्यवस्था गरिदिनुपर्छ ।’
