धनगढी : सुदूरपश्चिमका मुख्यमन्त्री कमल बहादुर शाहले आज विश्वासको लिने भएका छन । उनको विश्वासको मतका लागि आज अपरान्ह ५ बजे प्रदेश सभा बोलाईएको छ ।
आर्थिक अनियमिततामा मुछिएपछि असारको १९ गते मुख्यमन्त्री शाहले नागरिक उन्मुक्ति पार्टीको तर्फबाट उद्योग पर्यटन बन तथा वातावरण मन्त्री रामेश्वर चौधरीलाई बर्खास्त गरेपनि नाउपाले उनलाई दिएको समर्थन फिर्ता लिएको थियो ।
त्यसपछि मुख्यमन्त्री शाहले विश्वासको मत लिनुपर्ने आवाज उठ्दै आएको थियो । ‘आज अपरान्ह ५ बजेका लागि प्रदेश सभा बोलाईएको छ । मुख्यमन्त्री शाहले विश्वासको मत लिने भनेपछि प्रदेश सभा बोलाईएको हो’ प्रदेश सभा सचिव देवबहादुर बोगटीले भने ।
५३ सदस्यीय प्रदेश सभामा अहिले ५२ सदस्य छन । नेकपा (एस) संसदीय दलका नेता दीर्घ बहादुर सोडारी भ्रष्टाचारको मुद्धा लागेपछि निलम्बनमा छन भने बाँकी रहेका ५१ सदस्य मध्ये विश्वासको मतका लागि २७ जना प्रदेश सभा सदस्य आवश्यक पर्छ । प्रदेश सभामा काँग्रेसका १८, नेकपा एमालेका ११, नेकपा माओवादी केन्द्र का सभामुख सहित ११, नाउपाका ७, समाजवादीका ३, राप्रपा १ र स्वतन्त्र १ जना प्रदेश सभा सदस्य छन ।
प्रदेश सरकारमा अहिले काँग्रेसका १८ र नेकपा एमालेका ११ गरी २९ प्रदेश सभा सदस्यको मुख्यमन्त्रीलाई समर्थन छ । यद्यपी उनले आजको विश्वासको मतका लागि नाउपाको पनि समर्थन खोजिरहेका छन । नेपाली काँग्रेस संसदीय दल र नेकपा एमाले मुख्यमन्त्री कमल बहादुर शाहको पक्षमा मतदान गर्न ह्विप नै जारी गरिसकेका छन ।
तर नाउपाका ७ जनाले मुख्यमन्त्रीलाई मत दिने नदिने भन्ने कुरा अहिले नै टुंगो लागि सकेको छैन । ‘मुख्यमन्त्रीले हाम्रो पार्टीका मन्त्रीलाई बर्खास्त गरेका छन । न कुनै मुद्धा लागेको छ । न अख्तियारले नै मुद्धा लगाएको छ । त्यत्तीकै मन्त्रीलाई बर्खास्त गरेका छन । उनलाई पुर्नबहाली गरेमा मात्रै हामी विश्वासको मत हाल्छौं, हैन भने विपक्षमा भोट हाल्ने सल्लाह भईरहेको छ’ नाउपाका संरक्षक रेशमलाल चौधरीले भने ।
उनले केहीबेरमा त्यसबारे निर्णय लिनका लागि पार्टी संसदस्य दलको बैठक बसिरहेको बताए । नाउपाका प्रदेश सभा सदस्य लक्ष्मणकिशोर चौधरी विरामी भएर काठमाण्डौं छन भने बाँकी रहेका ६ जना मध्ये ३÷३ जना विश्वासको मत दिने र नदिने पक्षमा विभाजित भएका छन ।
तर मुख्यमन्त्री शाहले भने आफुले विश्वासको मत पाउने बताए । ‘काँग्रेस एमालेकै बहुमत भन्दा बढी सदस्य छन, त्यसैले विश्वासको मत पाउछु, तर अरु दलहरुलाई पनि मिलाएर लैजाने प्रयास जारी रहन्छ’ मुख्यमन्त्री शाहले भने ।
प्रमुख प्रतिपक्षमा रहेको नेकपा माओवादी केन्द्र, प्रतिपक्षमै रहेको समाजजादी बाहेक स्वतन्त्र सांसद डाक्टर तारा प्रसाद जोशी र राप्रपाले पनि विपक्षमा मत हाल्ने तयारी गरेका छन ।
