धनगढी :प्रशासन सेवा, लेखा समुहको दरबन्दी पुनरावलोकन गर्न गठित संगठन तथा व्यवस्थापन सर्वेक्षण अध्ययन कार्यदलले सुदुरपश्चिम प्रदेशका मुख्यमन्त्री कमलबहादुर शाह समक्ष प्रतिवेदन बुझाएको छ ।
सुदुरपश्चिम प्रदेश सरकार मन्त्रिपरिषदको मिति २०८१ फाल्गुन २१ गतेको निर्णयानुसार प्रदेश निजामती सेवा नियमावली २०८१ को नियम २४(१) अनुसार प्रशासन सेवा, लेखा समुहको संगठन तथा व्यवस्थापन सर्वेक्षण अध्ययन कार्यदल गठन गरिएको थियो । प्रतिवेदन तयारीका लागि कार्यदललाई १५ दिनको अवधि दिएको थियो । दिइएको समावधि अपर्याप्त भएपछि सात दिन थपगरी सुझाब सहितको प्रतिबेदन आज बुधबार मुख्यमन्त्री शाहलाई बुझाएको हो ।
प्रतिवेदनमा प्रदेश निजामती सेवा नियमावली, संघीय सरकारको कार्यविधि समेतको आधारमा कार्यप्रकृति, कार्यबोझ, आवश्यकता, औचित्य, सान्दर्भिकता समेत हेरी वर्तमान संगठन संरचनाको वृहत अध्ययन विश्लेषणका आधारमा प्रस्तावित संरचना प्रस्ताब गरिएको छ । संरचनाले हालकायम कुल दरबन्दी संख्यामा कुनै थप नहुने गरी भैरेहेको दरबन्दीको पुनरावलोकन, विवेचनात्मक र विश्लेषणात्मक विधिबाट सिफारिस गरिएको छ । प्रदेश सचिब झलकराम अधिकारीको संयोजकत्वमा ६ सदस्यीय कार्यदल गठन गरिएको थियो ।
