धनगढी : नेकपा एमाले सुदूरपश्चिम प्रदेश कमिटीले कैलालीको धनगढीमा आयोजना गर्न लागेको प्रदेशस्तरीय विशेष सभामा एमालेका तीन पदाधिकारीले सम्बोधन गर्ने भएका छन् ।
नेकपा एमालेका उपाध्यक्ष युवराज ज्ञवाली, महासचिव शंकर पोखरेल र सचिव तथा प्रदेश इन्चार्ज लेखराज भट्टले सम्बोधन गर्ने कार्यक्रम तय भएको एमाले प्रदेश उपसचिव तथा प्रदेश प्रचार तथा प्रकाशन विभाग प्रमुख भागरथी विष्टले जानकारी दिइन् ।
प्रदेश कमिटी सचिवालयको छैटौँ बैठकले बृहत विशेष सभाको तयारी तीव्र बनाउने निर्णय गर्दै र सम्बोधन गर्ने नेताहरूको बारेमा जानकारी गराइएको थियो । ‘लोकतान्त्रिक गणतन्त्रको संस्थागत विकास, संविधानको रक्षा र अराजकताविरुद्ध आयोजना गर्न लागिएको कार्यक्रम भब्य बनाउने गरि तयारी भएको छ’ उपसचिव बिष्टले भनिन् । ‘केन्द्रीय तीन पदाधिकारीले सम्बोधन गर्ने कार्यक्रम तय भएको छ ।’
नेकपा एमालेले देशभर सञ्चालन गरिरहेको वडा केन्द्रित टोल अभियानको निरन्तरताका रुपमा कैलालीमा सभा आयोजना गर्न लागिएको उनले बताइन् । सभामा सबै तहका नेता, कार्यकर्ता, तथा परिवर्तन पक्षधर आम जनतालाई सहभागी हुन आग्रह गरिएको छ ।
‘परिवर्तन विरोधी गतिविधिविरुद्ध कडा सन्देश दिन सभा आयोजना गरिएको हो’ इन्चार्ज लेखराज भट्टले भने ‘जनताको साथमा एमाले छ भन्ने सन्देश पनि सभाले दिनेछ ।’ पार्टीले यस सभालाई सुदूरपश्चिममा शक्ति प्रदर्शनसहित जनचेतना अभिवृद्धिका रुपमा लिएको छ ।
सचिवालय बैठकमा सभाको व्यवस्थापन र तयारीसहित पार्टीलाई अझै जनमुखी केन्द्रित बनाउने बारे छलफल भएको छ । स्ववियु निर्वाचनको समीक्षा गर्दै बाकी रहेका कलेजहरूमा अखिललाई जिताउने गरि लाग्ने, अधिवेशन गर्न वाकी रहेका सबै कमिटीहरूको वैशाख १५ सम्म अधिवेशन सम्पन्न गर्ने, सदस्यता नवीकरण र अनलाइन अभिलेखीकरणलाई अगाडी बढाउने सचिवालयले निर्णय गरेको छ ।
पार्टी गतिविधि विरुद्ध लागेको भन्दै एमाले प्रदेश सल्लाहकार गोविन्द कुवरलाई कारबाही गर्न सचिवालय बैठकले केन्द्रीय कमिटीलाई सिफारिस गर्ने निर्णय पनि गरेको छ ।
