धनगढी : नेकपा माओवादी केन्द्रको संसदीय दलले समर्थन फिर्ता लिएको पत्र मुख्ममन्त्री कमल बहादुर शाहलाई बुझाएको छ । नेकपा माओवादी केन्द्रको संसदीय दलका नेता मान बहादुर धामीले बुधबार नै उक्त पत्र मुख्यमन्त्री शाहलाई बुझाएका हुन ।
नेकपा माओवादी केन्द्रका सभामुख सहित ११ प्रदेश सभा सदस्य छन । तर पनि मुख्यमन्त्री कमल बहादुर शाहसँग अझै ३० प्रदेश सभा सदस्यको बहुमत कायमै रहन्छ । उनलाई काँग्रेसका १९, नागरिक उन्मुक्ति पार्टीका ७ र समाजवादीका ४ गरी ३० जनाको समर्थन कायमै छ । बहुमतका लागि २७ जनाको समर्थन आवश्यक पर्छ ।
केन्द्रमा नागरिक उन्मुक्ति र समाजवादी गठबन्धनमा सहभागि हुने वा नहुने निर्णयमा पुगि नसकेकाले सुदूरपश्चिममा पनि यी दुुई दलले सरकारको समर्थन फिर्ता लिएका छैनन । मंगलबार मात्रै मुख्यमन्त्री कमल बहादुर शाहले माओवादीका दुई मन्त्री र एक राज्यमन्त्री बर्खास्त गरेपछि माओवादीले पनि आज सरकारलाई दिएको समर्थन फिर्ता लिएको हो ।
मुख्यमन्त्री शाहले सामाजिक विकास मन्त्री भएका झपट साउद, उद्योग पर्यटन वन तथा वातावरण मन्त्री रमेश धामी र राज्य मन्त्री गीतादेबी माललाई बर्खास्त गरेका थिए ।
