धनगढी : नागरिक उन्मुक्ति पार्टीले सुदूरपश्चिममा कमल बहादुर शाह नेतृत्वको सरकारलाई दिएको समर्थन कायमै राख्ने निर्णय गरेको छ । आईतबार दिउसो २ बजेदेखि संसदीय दलको कार्यालयमा बसेको दलको बैठकले यसतो निर्णय गरेको हो ।
बैठकपछि संसदीय दलका नेता घनश्याम चौधरीले ५ जना प्रदेश सभा सदस्यको उपस्थितिमा यस्तो निर्णय भएको बताए । ‘हामीहरु कमल बहादुर शाह नेतृत्वको सरकारमै छौं, ५ जना मन्त्री पनि भएका छौं । संसदीय दलको बैठकले शाह नेतृत्वको सरकारलाई दिएको समर्थन कायमै राख्ने निर्णय गरेको छ’ बैठक पछि उनले भने ।
बैठकमा दलका नेता घनश्याम चौधरी (आर्थिक मामिला मन्त्री), भूमी ब्यवस्था कृषि तथा सहकारी मन्त्री रामेश्वर चौधरी, बिना विभागीय मन्त्री खुसीराम चौधरी र लक्ष्मण किशोर चौधरी तथा भूमी ब्यवस्था कृषि तथा सहकारी राज्यमन्त्री ईन्द्र गिरि गरी ५ जना प्रदेश सभा सदस्यको उपस्थिति रहेको थियो ।
तर संघमा भने नागरिक उन्मुक्ति पार्टीले नयाँ गठबन्धनमा मतदान गरेको थियो । उन्मक्तिकी अध्यक्ष रञ्जीता चौधरी र संरक्षक रेशम चौधरी बीचको विवाद यस निर्णयले अझ उजागर भएको छ ।
