धनगढी : धनगढी उपमहानगरपालिकाका नगरप्रमुख गोपाल हमाललाई ज्यान मार्ने धम्की आएको छ । मेयर हमालको ह्वाट्सएपमा कल गर्दै राना थरका एक व्यक्तिले ज्यान मार्ने धम्की दिएका हुन् । आज राती ज्यान मार्ने भन्दै धम्की आएको हमालको सचिवालयले जनाएको छ ।
ज्यान मार्ने धम्कीपछि नगर प्रमुख हमालले जिल्ला प्रशासनमार्फत सुरक्षा व्यवस्था गरिदिन निवेदन दिएका छन् । जिल्ला प्रशासन कार्यालय कैलालीका सूचना अधिकारी शिवराज जोशीले नगर प्रमुखले निवेदन पेस गरेको बताए । उनले सो निवेदन जिल्ला प्रहरी कार्यालय पठाइएको बताए ।
नगर प्रमुखलाई दिएको धम्कीको विषयमा निवेदन प्रहरीमा आइपुगेको जिल्ला प्रहरी कार्यालय कैलालीका प्रमुख पदमबहादुर विष्टले बताए । ‘धम्की दिने व्यक्ति यही मटियारीको रहेछ, हामीले उनीसँग फोन सम्पर्क गरेका छौँ’ एसपी विष्टले भने । ‘उसले मेयर सापलाई खबरदार भनेर लेखेको रहेछ ।’
प्रहरीका अनुसार रानाले आफु लम्की पुगेको र आजै प्रहरीमा आउने बताएका छन । प्रहरी प्रमुख विष्टले भने, ‘रानाले लिन आउनु पर्दैन भने पनि हामीले उच्च निगरानीमा राखेर सुरक्षा प्रबन्ध गरेका छौँ ।’ धम्की दिनुको कारण भने खुलेको छैन् । धम्की दिने व्यक्तिलाई नियन्त्रणमा लिन प्रहरी एक्सनमै रहेको जिल्ला प्रहरी कार्यालयले जनाएको छ ।
