धनगढीः बझाङको छबिसपाथिभेरा गाउँपालिका–१ जालीबगरमा सुख्खा पहिरो खसेर अवरुद्ध भएको जयपृथ्वी राजमार्ग २ दिनपछि सूचारु भएको छ ।
अवरुद्ध सडक खुलाउन शुक्रबार बिहानबाटै पहिरो पन्छाउन सुरु गरिएको थियो । जिल्ला प्रहरी कार्यालय बझाङका प्रमुख डीएसपी युवराज भण्डारीलले पहिरो ठूलो भएकाले राजमार्ग खुलाउन समय लागेको बताए । ‘हिजो निरन्तर ढुंगामुढा झरिरहेकाले पहिरो पन्छाउन सकिएन, आज बिहानैबाट डोजरको सहायताले पहिरो पन्छाईयो, यातायातका साधन चल्न सुरु भइसकेको छ’ डिएसपी भण्डारीले भने । ‘ठूलै पहिरो भएकाले बाटो खुल्न समय लागेको हो ।’
पहिरो झर्न नरोकिएपछि स्थानीय प्रशासनले सो क्षेत्र नजिक जान रोक लगाएको छ । अहिले पूर्णरुपमा राजमार्ग सूचारु भइसकेको उनले बताए । पहिरो खसेका कारण बिहीबार बिहान ७ बजेदेखि बन्द भएको जयपृथ्वी राजमार्ग आज दिउँसोबाट खुलेको हो । दुईवटा मेसिन लगाएर पहिरो हटाउने काम भएको थियो ।
बझाङलाई अन्य जिल्लासँग जोड्ने एक मात्र सडक दैनिक जसो अवरुद्ध हुँदा यात्रुले निकै सास्ती खेप्नु परेको छ । जिल्ला बाहिर लैजानुपर्ने बिरामी, बालबालिका, अशक्त, बालबालिका र जेष्ठनागरिकको यात्रा कष्टकर हुने गरेको छ । साउन महिना यता मात्रै जयपृथ्वी राजमार्ग ४० पटक अवरुद्ध भइसकेको छ । जयपृथ्वी राजमार्ग दिनहुँजसो अवरुद्ध हुन थालेको छ ।
पहिरोले राजमार्ग छेउ गाडिएका विद्युत प्रशारण लाइनमा क्षति हुँदा विद्युतसेवा समेत अवरुद्ध हुने गरेको छ । साउनयता मात्रै जयपृथ्वी राजमार्ग ४० पटक अवरुद्ध भइसकेको प्रमुख जिल्ला अधिकारी विश्वामित्र कुँइकेलले बताएका छन् ।
