धनगढी : कैलाली उद्योग वाणिज्य संघको नयाँ नेतृत्व चयनका लागि भदौ २८ गते हुने निर्वाचनलाई लक्षित गर्दै अध्यक्ष पदका उम्मेदवार रूपेश स्वाँरले आफ्नो प्यानलसहित १८ बुँदे घोषणापत्र सार्वजनिक गरेका छन् ।
नयाँ कार्यसमितिको लागि दाबेदारीका लागि दुई समूहको प्रतिस्पर्धा हुने भएको छ । अहिले उम्मेदवारहरू व्यवसायीहरुलाई आफ्नो पक्षमा पार्ने माहोल बनाउन सक्रिय बनेका छन् ।
संघको अध्यक्षका लागि दुई जनाले उम्मेदवारी नै घोषणा गरिसकेका छन् । पूर्वमहासचिव रुपेश स्वाँर र अहिलेका वरिष्ठ उपाध्यक्ष पुष्कर ओझा अध्यक्षमा उम्मेदारी घोषणा गरेका हुन् ।
स्वाँर समूहले आईतबार प्यानलसँगै आफ्नो चुनावी घोषणापत्र सार्वजनिक गरेको छ । “व्यवसाय र व्यवसायीको सुरक्षा ः हाम्रो प्रतिबद्धता” भन्ने नाराका साथ स्वाँर प्यानल चुनावमा होमिएको छ । “व्यवसायीको मुलुकमा बढ्दो योगदानलाई मुलुकको नीति निर्माण तहसम्म पुर्याउने मात्र नभई, यो हाम्रो प्रतिवद्धता हुनेछ” प्रतिबद्धतापत्रमा भनिएको छ, ’व्यवसायीलाई दैनिक क्रियाकलापमा देखिने कठिनाइ, समस्या र चुनौतिहरूको समाधानलाई नै आफ्नो पहिलो कार्यसूचीका रुपमा लिनेछौं । कैलाली उद्योग वाणिज्य संघलाई अझ सशक्त बनाउन र संघलाई थप अगाडि बढाउन अमूल्य मतबाट जिम्मेवारी बहन गर्ने अवसर दिनुहुनेछ भने व्यवसायीको साझा आस्था कायम पाउने छौं ।
व्यवसाय र व्यवसायीको हकहितको लागि कानुनी तथा प्रशासनिक समस्याहरूको स्थायी विशेष पहल, स्टार्टअप, इनोभेसन र क्रियसन लगायत नयाँ उद्यमशील उर्जासाथ युवा व्यवसायीहरूको लागि कोषसमेत संचालन गर्ने, विपद् व्यवस्थापन कोषको स्थापना र उद्योग व्यवसायीहरूको चाहनाअनुसार विधान संशोधन र परिमार्जन गर्ने, बैंक तथा वित्तीय संस्था, कर, भन्सार, बीमा लगायतका हाल विद्यमान समस्याको प्रभावकारी समाधानका लागि ठोस पहल गर्ने लगायतका प्रतिबद्धता स्वाँर प्यानलको छ ।
स्वाँरको प्यानलबाट केशवराज जोशी वरिष्ठ उपाध्यक्ष लड्ने भएका छन् । उनी वर्तमान उपाध्यक्ष पनि हुन् । यस्तै, उपाध्यक्ष उद्योगमा लक्ष्मणराज पन्त, एसोसियट उपाध्यक्षमा अनिलकुमार भुजनिया, वाणिज्य उपाध्यक्षमा राधिका चौधरी र वस्तुगत उपाध्यक्षमा सिद्धराज पनेरु उम्मेदवार रहेका छन् । स्वाँर प्यानलबाट महासचिवमा सुरेश पाण्डेय, कोषाध्यक्षमा तिलक बोहरा र सचिवमा प्रकाशकुमार चन्द स्वाँर प्यानलबाट उम्मेदवार रहेका छन् । सदस्यमा रुपेश खड्का, अम्बिका भण्डारी, मिलन कुँवर, प्रेमबहादुर धामी, भरतबहादुर थापा, नेत्रप्रसाद तिवारी, देवराज जोशी, तेज बम, शुभशंकर ठाकुर, दिपेश राठोर, अमर चोखाल, प्रमिला पाठक र मन्जु भट्ट उम्मेदवार छन् । घोषणा कार्यक्रममा कैलाली उद्योग वाणिज्य संघका वर्तमान अध्यक्ष पुष्पराज कुँवर पनि सहभागी थिए ।
स्वाँर ०७५ पुसमा भएको संघको निर्वाचनमा अध्यक्षका प्रत्यासी थिए । उनी उक्त निर्वाचनमा पुष्पराज कुँवरसंग ७९ मतले पराजित भएका थिए । ०७९ जेठमा भएको निर्वाचनमा भने उनी चुनाव लडेका थिएनन् ।
घोषणापत्रका मुख्य बुँदाहरू :
-व्यवसाय र व्यवसायीको कानुनी तथा प्रशासनिक समस्या समाधानका लागि विशेष पहल।
- स्टार्ट–अप, नवप्रवर्तन र युवा उद्यमशीलतालाई कोषमार्फत सहयोग ।
-विपद् व्यवस्थापन कोषको स्थापना ।
- अस्थायी कोरेन्टाइनलाई स्थायी स्वरूपमा स्थापना गर्ने पहल ।
- बैंक, वित्तीय संस्था, कर, भन्सार र बीमा क्षेत्रमा देखिएका समस्याको समाधान ।
- सीमापार अवैध व्यापार, चोरी निकासी तथा पैठारी नियन्त्रणका लागि कडाइ ।
- नाकामा हेल्पडेस्क स्थापना गरी आयात–निर्यात सहज र पारदर्शी बनाउने ।
- कृषि, गैरकृषि तथा औद्योगिक उत्पादनको वैज्ञानिक बजारीकरणका लागि सरकारी तथा सरोकारवालासँग समन्वय ।
- संघका सदस्यहरूको अभिलेखीकरण, नवीकरण र सदस्यता प्रक्रियाको डिजिटलाइजेशन ।
- धनगढी लगायत प्रमुख बजारहरूमा रात्रीकालीन व्यवसाय सञ्चालन ।
- धनगढीको पार्किङ समस्या समाधान र लगानी सम्मेलनको आयोजना ।
- व्यवसायीका गुनासा संकलन तथा सम्बोधनका लागि अनलाइन–अफलाइन संयन्त्र विकास ।
- औद्योगिक क्षेत्रको स्थापना, सहज विद्युत आपूर्ति, यातायात र पूर्वाधार विकासमा पहल ।
महोत्सवलाई व्यवस्थित गर्ने प्रतिवद्धता
घोषणापत्रमा सुदूरपश्चिम महोत्सवलाई अझ व्यवस्थित, पारदर्शी र स्थानीय उत्पादन, कला–संस्कृति तथा लुकेका प्रतिभालाई प्रोत्साहन गर्ने गरी अघि बढाइने उल्लेख गरिएको छ ।
