धनगढी : नेकपा माओवादी केन्द्रका उपमहासचिव तथा सुदूरपश्चिम ईञ्चार्ज गिरीराजमणी पोखरेलले बझाङमा जनक बुढालाई जिताउन आह्वान गरेका छन । आईतबार धनगढीमा पत्रकार सम्मेलनको आयोजना गर्दै नेता पोखरेलले आफुनो पार्टीले एकल रुपमा बुढालाई उमेदवार बनाएको बताउदै नेता कार्यकर्तालmाई उनलाई जिताउन आह्वान गरे ।
‘हामीले उम्मेदवारको नाम सर्वसम्मत सिफारिस गर्ने निर्णय गरेका छौँ’ प्रदेश सचिवालयको बैठकपछि आयोजित पत्रकार सम्मेलनमा उनले भने, ‘उम्मेदवारको औपचारिक घोषणा पार्टी केन्द्रले गर्नेछ।’
बुढा २०७० को संविधान सभा सदस्य हुन् । २०५६ सालमा महेन्द्रनगरको सिद्धनाथ बहुमुखी क्याम्पसमा माओवादी निकट अखिल क्रान्तिकारीमा आवद्ध भएका उनी २०५८ मा भूमिगत भएका थिए । जनयुद्धकालमै अखिल क्रान्तिकारीको केन्द्रीय सदस्य, त्यसपछि पार्टीको बाजुरा र बैतडीको सचिव तथा लामो समय बझाङको जिल्ला अध्यक्ष तथा इन्चार्ज भएका थिए ।
बझाङ क्षेत्र नम्बर १ बाट काँग्रेसबाट निर्वाचित प्रदेश सरकारका तत्कालीन आन्तरिक मामिला तथा कानुन मन्त्री पृथ्वीबहादुर सिंहको दुर्घटनामा परेर निधन भएपछि उपनिर्वाचन हुन लागेको हो । बझाङमा एमालेले दमन भण्डारी र एकीकृत समाजवादीले दिलबहादुर सिंहलाई उम्मेदवार बनाउने निर्णय गरेको छ । काँग्रेसले भने उम्मेदवारको टुङ्गो लगाइसकेको छैन । काँग्रेसको जिल्ला र प्रदेश समितिले १० जना आकांक्षीको नाम केन्द्रमा सिफारिस गरेको छ ।
यस्तै संसदीय दलका नेता मानबहादुर धामीको अध्यक्षतामा आइतबार बसेको बैठकले प्रदेशमा पनि नयाँ समीकरणअनुसार सरकार गठन गर्ने निर्णय गरेको छ । संसदीय दलका नेता धामीले गठबन्धनको सरकार निर्माणका लागि जुनसुकै विकल्पमा पनि छलफल गर्न आफ्नो दल तयार रहेको बताए ।
गत २२ फागुनमा माओवादीले र २३ फागुनमा एकीकृत समाजवादीले मुख्यमन्त्री कमलबहादुर शाहलाई दिएको समर्थन फिर्ता लिएका थिए । अल्पमतमा परेका मुख्यमन्त्री शाह नागरिक उन्मुक्ति पार्टी तथा एक सदस्य रहेको राप्रपा र स्वतन्त्र सांसद डा. तारा जोशीको समर्थनमा बहुमत जुटाउने रणनीतिमा छन् ।
