धनगढी : कैलालीमा प्रहरीको सुराक दिएर तस्करी गराउन मदत गर्ने दुईजना पक्राउ परेका छन । जिल्ला प्रहरी कार्यालय कैलालीको टोलीले शनिबार र आईतबार गरी दुईजनालाई पक्राउ गरेको हो । शनिबार धनगढी–७ बस्ने बुद्दीराम चौधरी र आईतबार धनगढी–९ तारातालका ३२ वर्षीय पदम पार्कीलाई पक्राउ गरिएको प्रहरीले जनाएको छ ।
शनिबार पक्राउ परेका चौधरीलाई से ४ प ५८६१ नम्बरको स्कुटी सहित जिल्ला प्रहरी कार्यालय कैलालीबाट खटिएको प्रहरी टोलीले नियन्त्रणमा लिएको हो भने उनकै सूचनाका आधारमा पार्कीलाई आईबार अपरान्ह पक्राउ गरिएको कैलालीका एसपी पदम बहादुर विष्टले बताए ।
कसरी गर्थे सुराकी ?
शनिबार जिल्ला प्रहरी कार्यालय कैलालीलाई जुगेडा नजिकबाट मोटरसाईकलमा सामान तस्करी भईरहेको सूचना आयो । भारतबाट नेपाली नम्बरको मोटरसाईकलमा भन्सार छलेर सामान आईरहेको खबर पाएलगत्तै जिल्ला प्रहरी कार्यालय कैलालीका प्रमुख पदम बहादुर विष्टले सादा पोषाकका प्रहरी पठाए ।
तर सूराकीले दिएको सूराकका आधारमा उक्त मोटरसाईकल फेला परेन । तस्कर समात्न गएको प्रहरीले निगरानी गर्दै जाँदा खेतमा एउटा वेवारिसे स्कुटर भेटायो । से ४ प ५८६१ नम्बरको त्यो स्कुटर कसको हो भनेर पत्ता लगाउदा खेतमा लुकेर बसेका बुद्धीराम चौधरी भागेपछि प्रहरीले उनलाई समात्यो । त्यसपछि गरिएको सोधपुछका क्रममा चौधरीले आफु तस्करहरुको सुराकी रहेको बयान दिएका छन ।
बुद्धीराम र उनका साथीहरुको काम भनेकै सीमा क्षेत्र आसपासमा भएका नेपाल प्रहरी र सशस्त्र प्रहरीको सुराक तस्करलाई दिने हो । भारतको बनगवा, सुडा लगायतका स्थानबाट मोटरसाईकलमा सामान तस्करी गर्नेहरुले आफुहरु त्यहाँबाट हिडेको खबर गर्ने वित्तिकै यी सुराकीहरु प्रहरी बस्ने सम्भावित स्थानमा गएर त्यसको सूचना तस्करलाई दिने गर्छन ।
कैलालीका प्रहरी उपरिक्षक पदम बहादुर विष्ट भन्छन, ‘एक पटक प्रहरीको सुराक दिएको ५ सय देखि १२ सम्म रेट रहेछ ।’ उनले बढी सामान भएका तस्करबाट १२ समय सम्म पनि एक पटकमा लिने गरेको पाईएको बताए । बुद्धीरामले आफुले विगत ४÷५ वर्ष देखि प्रहरीको सुराक तस्करलाई दिने गरेको बयान दिएका छन ।
बुद्धीरामको सूचनाका आधारमा आईतबार जिल्ला प्रहरी कार्यालय कैलालीको टोलीले अर्का सूराकी पदम पार्कीलाई पनि पक्राउ गरेको हो । प्रहरी उपरिक्षक विष्ट भन्छन, ‘तस्करहरुको नामलिस्ट प्रहरीकोसँग, तर खोज्न जादा उनीहरु भारत गएको सूचना प्राप्त भएको छ ।’ दुबै जना सूराकी पक्राउ परेपछि नेपाल तर्फको सीमा आसपासका तस्कर भारत भागेका छन ।
एसपी विष्टले कैलालीको कमाण्ड सम्हालेपछि भारतबाट हुने चोरीनिकासीमा कडाई गरेका छन । दुबै जनाले जुगेडा देखि त्रिनगर आसपासको खुला सीमानाको फाईदा उठाउदै तस्करहरुलाई प्रहरी बाटोमा भए नभएको सूचना दिदै आएको जिल्ला प्रहरी कार्यालय कैलालीले जनाएको छ ।
प्रहरीले उनीहरुको टेलिफोनको कल डिटेल निकालेर उनीहरुको सम्पर्कका आधारमा तस्करी गर्ने र सूराकी समुहको पहिचान गर्ने तयारी गरेको छ ।
