धनगढी : सुदूरपश्चिममा विषेश अधिवेशन अन्त्य भएपछि प्रदेश प्रमुख नजिर मियाले साउन २७ गते प्रदेश सभाको पाँचौ अधिवेशन आह्वान गरेका छन । प्रदेश सरकारको सिफारिसमा प्रदेश प्रमुख मियाँले आगामी २७ गते दिउँसो २ बजेको लागि प्रदेश सभा बैठक आह्वान गरेका हुन् ।
यसअघि निवर्तनमान मुख्यमन्त्री दीर्घ बहादुर सोडारीले असारको ३० गते बजेट अधिवेशन अन्त्यको सिफारिस गरेपछि प्रदेश प्रमुख मियाले साउनको ४ गते बजेट अधिवेशन अन्त्य गरेका थिए । तर सोडारीले अध्यादेशबाट बजेट ल्याउने तयारी गरेको थाहा पाएपछि काँग्रेस र एमालेका एक चौथाई सांसदहरुले विषेश अधिवेशन माग गरेपछि प्रदेश प्रमुख मियाले साउन ८ गते विषेश अधिवेशन आह्वान गरेका थिए ।
विषेश अधिवेशन बाढीपहिरो प्रभावितहरुलाई राहत, क्षतीपूर्ती दिन सरकारलाई निर्देशन गर्दै साउन २३ गते अन्त्य गरिएको थियो । विशेष अधिवेशन अन्त्य गरेपछि सरकारले कर संकलनका लागि मात्रै ‘सुदूरपश्चिमको सामयीक कर संकलन सम्बन्धि अध्यादेश २०८१’ ल्याएको थियो । उक्त अध्यादेश विहीबार प्रदेश प्रमुखले प्रमाणित गरेर राजपत्रमा प्रकाशित भएपछि शुक्रबार देखि करसंकलनको कार्य सुरु भईरहेको छ ।
पाँचौं अधिवेशनमा मुख्यमन्त्री कमल बहादुर शाहले विश्वासको मत लिनेछन भने यसै अधिवेशनमा बजेट पनि आउने भएको छ । सरकारले प्रतिस्थापन बजेटका रुपमा पूर्ण बजेट ल्याउन लागेको हो । यसअघिका मुख्यमन्त्री सोडारीका पालामा असार १ गते संसदमा प्रस्तुत भएको बजेट टेबुल नै हुन नसक्दा निश्क्रिय भएको थियो ।
‘सकेसम्म मंगलबार नत्र बुधबार विश्वासको मत लिने तयारी भईरहेको छ । विश्वासको मत लिएर बजेट पनि बनाउनु छ । प्रदेशमा बजेट शून्यताको अवस्थाले विकास निर्माण प्रभावित भएका छन भने सरकारको कामकाजमा पनि समस्या भएको छ’ मुख्यमन्त्री कमल बहादुर शाहले भने ।
