बैतडी :बैतडीको सिगास गाउँपालिका– १ मा रहेका शिक्षण संस्था तथा सरकारी कार्यालयहरुमा आईतबार शोक बिदा दिईएको छ ।
वडा कार्यालयले शनिबार भएको जिप दुर्घटनामा मृत्यु भएका १९ वर्षिया पार्वती धामी र १४ वर्षिया जयन्ती धामीको शोकमा आईतबार बिदा दिएको हो ।वडाकै क्षेत्रमा भएको दुर्घटनामा २ जनाको मृत्यु हुनुका साथै अन्य ४ जना घाईते भएका थिए । वडाध्यक्ष रामचन्द्र ऐरीले दुर्घटनामा मृत्यु भएका किशोरीहरुको शोकमा वडाका शिक्षण संस्था र सरकारी कार्यालयहरुमा बिदा दिईएको बताए । उनले घाईते भएकाहरुको शिघ्र स्वास्थ्य लाभको कामना पनि व्यक्त गरे । दुर्घटनामा सिगास –१ कै ४० वर्षीय तुलसी धामी, १६ वर्षीया निरा धामी, १९ वर्षीया हेमन्ती धामी र १४ वर्षीया भागरथी धामी घाईते भएका थिए । घाइतेहरुको उपचार भइरहेको वडा अध्यक्ष ऐरीले बताए । शनिबार बिहान ५ बजे सिगास गाउँपालिका–१, को गडानबाट तल्लो इराना हुँदै फर्कंदै गरेको सुपप्र ०१–००१ च ४०२८ नम्बरको जिप माडौं भन्ने स्थानमा दुर्घटनामा परेको थियो । कच्ची सडकबाट जिप करीब ५ सय मिटर तल खसेको थियो ।
