धनगढी : राजश्व छलि गरेको भन्दै पटक पटक चर्चामा आउने धनगढीको हरिओम हार्डबेयरका सञ्चालकले यसपाली ३२ लाख राजश्व छलि गरेको पाईएको छ । भारतीय नागरिक आशिष गुप्ताले चालुआर्थिक वर्षमा मात्रै ३२ लाख बराबरको राजश्व छलि गरेको पाईएको हो ।
आन्तरिक राजश्व कार्यालय धनगढीले गरेको अनुसन्धानका क्रममा गुप्ताले ३२ लाख बराबरको कर छली गरेको पाइएको हो । राजश्व कार्यालयले गुप्ताले दुलारीदेवी भन्ने महिलाको नाममा फर्म दर्ता गरि सञ्चालन गरेको आरडेन इन्टरप्राइजेजले मूल्य अभिबृद्धि कर छली गरेको पाइएपछि ३२ लाख रुपैयाँ प्रारम्भिक कर निर्धारण गरेको जनाएको छ ।
१८ जेठमा गुप्तालाई पत्र लेख्दै राजश्व कार्यालयले निर्धारण गरिएको प्रारम्भिक कर बुझाउन निर्देशन दिएको छ । गुप्ताले बुधबार मात्र उक्त पत्र बुझेर लगेको आन्तरिक राजश्व कार्यालय स्रोतले जनाएको छ । अब गुप्ताले कर कार्यालयले निर्धारण गरेको प्रारम्भिक करमाथि चित्त नबुझेमा १५ दिनभित्र प्रमाणसहित निवेदन दिनुपर्नेछ ।
गुप्ताले प्रमाण पेश गर्न नसकेको अवस्थामा भने राजश्व कार्यालयले निर्धारण गरेको प्रारम्भिक कर बराबरको रकमा बुझाउनुपर्नेछ । कैलाली प्रहरीले गत १७ बैशाखमा धनगढीस्थित गुप्ताको गोदाममा छापा हान्दै ट्रकसहित ४० लाख बराबरको भन्सार छलीको सामान बरामद गर्दै उनलाई पक्राउ गरेको थियो ।
सोही दिन आन्तरिक राजश्व कार्यालयले समेत उनको गोदाममा छापा हानेको थियो । छापा हानेर बिल, बिजक नियन्त्रणमा लिएर अनुसन्धान गरिएकोमा आरडेन इन्टरप्राइजेजले ४४ लाख ३८ हजार बराबरको मौज्दात किताब भन्दा बढि स्टक राखेको र ३७ लाख ८८ हजार न्यून मौज्दात स्टक राखेको पाइएको राजश्व कार्यालयले जनाएको छ ।
गुप्ता भारतीय नागरिक भएपनि भारतीय दुतावासमार्फत व्यवसाय दर्ता गरि धनगढीमा हार्डवयरको व्यापार गर्दै आएका छन् । पैँसा र पावरको बलमा उनले लामो समयदेखि धनगढीमा अवैध कारोबार गर्दै एकछत्र राज गरिरहेको ब्यवसायीहरुको आरोप छ ।
लामो समयदेखि गुप्ताले लाखौँको कर छली, भारतबाट चोरी तस्करी गर्दै आएको आरोप लाग्ने गरेको छ । यसअघि पनि राजश्व अनुसन्धान विभागले उनको पसलमा पटक पटक छापा हान्दै राजश्व छलि गरेको भेटाएको थियो ।
