दिपायल : डोटीमा यात्रुवाहक बस दुर्घटना हुँदा १६ जना घाइते भएका छन् । धनगढीबाट दिपायल तर्फ जादै गरेको शैलेश्वरी यातायातको ना ५ ख ४४५१ नम्बरको बस दुर्घटनामा परेको हो ।
जिल्ला प्रहरी कार्यालय डोटीका सूचना अधिकारी, प्रहरी नायव उपरीक्षक (डिएसपी) भिमलाल भट्टराईका अनुसार दिपायल सिलगढी नगरपालिका–४ समुहगाड नजिक आज बिहान ५ बजेतिर बस दुर्घटनामा परेको हो ।
दुर्घटनामा परि घाइते भएकाहरूको राजपुर स्थित सुजङ अस्पतालमा उपचार भइरहेको छ । ४ जना घाइतेहरूको अवस्था गम्भीर रहेको र बाँकी सामान्य रहेको डिएसपी भट्टराईले बताए ।
बस सडकबाट करिब ३५ मिटर तल खसेको छ । बस उकालोमा भएकाले प्राविधिक कारणले दुर्घटना भएको हुनसक्ने प्रहरीले बताएको छ ।
