अछाम : अछाममा महिनावारी भएका कारण घरदेखि टाढा त्रिपाल टाँगी सुतिरहेको अवस्थामा पहिरोमा परि दुई जनाको मृत्यु भएको छ । अछामको पंचदेवल विनायक नगरपालिका ८ बारलामा सुतेको समयमा ढुंगा लागेर दुई जनाको मृत्यु भएको हो ।
आज विहान करिव ५ बजेको समयमा सेलापानीस्थित चुरखोली टोलमा पहिरोसंगं खसेको ढुंगा लागि पंचदेवल विनायक नगरपालिका ८ की ३५ वर्षिया निम खनाल र मंगलसेन नगरपालिका ६ की ७ वर्षिया कविता भण्डारीको घटनास्थलमै मृत्यु भएको प्रहरीले जनाएको छ ।
उनीहरुसंगै सुतेकी कविताकी आमा रत्ना भण्डारी घाईते भएकी छिन् । उनलाई उपचारको लागि स्थानीय स्वास्थ्य चौकी बारला पठाइएको प्रहरीले जनाएको छ । निम र रत्ना दुबै महिनावारी भएको समयमा घरदेखि टाढा खेतबारीमा त्रिपाल टाँगेर सुतेको अवस्थामा घट्ना भएको वडा अध्यक्ष छत्रबहादुर शाहीले बताए ।
कविता आमासँगै सुत्न गएकी थिईन् । गाउँ माथिको भिरबाट ढुंगा त्रिपालमाथि खसेको शाहीले बताए । उनका अनुसार दुबै महिलालाई महिनावारी भएको आज ६ दिन पुगेको थियो ।
उक्त स्थानमा अनुसन्धान तथा कानूनी प्रक्रियाको लागि जिल्ला प्रहरी कार्यालयबाट प्रहरी निरीक्षक टेक बहादुर देउवाको नेतृत्वमा प्रहरी खटिएको जनाइएको छ । भण्डारी परिवारको स्थायी ठेगाना मंगलसेन नगरपालिका वडा नं ६ रहेको बुझिएको छ । उनीहरु केही महिना पहिले मात्रै ससुराली गाउँमा गएर बसेको बुझिएको वडा अध्यक्ष शाहीले बताए ।
गोठहरु भत्काइए पनि महिनावारी भएको समयमा कोही पाल टाँगेर, कोही डोकोमा त कोही सौचालयमा समेत सुत्ने गरेको शाहीले जानकारी दिए ।
