धनगढी : नेपाली बजारमा सुनको मूल्य नयाँ रेकर्ड कायम गर्दै तोलामा २ लाख रुपैयाँ नाघेको छ। नेपाल सुनचाँदी व्यवसायी महासंघका अनुसार शुक्रबार छापावाल सुनको मूल्य तोलामा २ लाख ६ सय रुपैयाँ पुगेको हो। यो हालसम्मकै उच्च मूल्य भएको महासंघले जनाएको छ।
यसअघि बिहीबार तोलामा १ लाख ९९ हजार ४०० रुपैयाँमा कारोबार भएको सुन आज १ हजार २०० रुपैयाँले बढेको हो। यस्तै, चाँदीको मूल्यमा पनि वृद्धि भएको छ। बिहीबार तोलामा २ हजार ३५५ रुपैयाँ कायम भएको चाँदी शुक्रबार तोलामा २ हजार ३६० रुपैयाँमा कारोबार भएको महासंघले जनाएको छ।
