धनगढी : सरुवा भई धनगढी डिभिजन खटाइएका वरिष्ठ डिभिजन वन अधिकृत राम बिचारी ठाकुरले पदभार ग्रहण गरेका छन् । उनले भदौ ४ गते कञ्चनपुरबाट रमाना लिई भदौ ६ गतेदेखि कैलालीको धनगढीको डिभिजनको जिम्मेवारी सम्हालेका हुन् ।
मुख्यमन्त्री तथा मन्त्रिपरिषद्को सुदूरपश्चिम प्रदेश सरकारको श्रावण ३० गतेको निर्णय अनुसार ठाकुरलाई कञ्चनपुरबाट कैलाली कामकाजको लागि खटाइएको हो । ठाकुरको स्थानमा वरिष्ठ वन अधिकृत रामचन्द्र कँडेललाई पठाइएको छ भने पहलमानपुर डिभिजनमा कृष्णदत्त भट्टलाई पनि सरुवा गरिएको छ ।
यसबीच, सरकारको सरुवा निर्णयविरुद्ध दुई जना डिभिजन वन अधिकृतले उच्च अदालत दिपायलमा रिट दायर गरेका थिए ।
अदालतले भदौ ५ गते सरकारको नाममा अल्पकालीन आदेश जारी गरेको थियो, जसलाई प्रदेश बन मन्त्रालयले भदौ ६ गते सम्बन्धित बन कार्यालयमा कार्यान्वयन गर्न पत्राचार गरेको छ । यद्यपि ठाकुरले भने आफूले अदालतको आदेश आउनु भन्दा अघिनै रमाना लिई कार्यालयमा हाजिर भइसकेको बताए । उनले भने, “मैले प्रदेश सरकारको आदेश पालना गरेर भदौ ४ गते रमाना लिएको हुँ । नियमानुसार कार्यालयमा हाजिर भएपछि मात्र अदालतको आदेश आएको हो । अदालतको भावी फैसलाप्रति मेरो पूर्ण सम्मान रहनेछ ।”
ठाकुरले आफू प्रदेश सरकारको आदेशअनुसार जिम्मेवारी सम्हालेको र डिभिजन बन कार्यालय कैलालीको सम्पूर्ण काममा पूर्ण रूपमा जवाफदेही हुने स्पष्ट पारेका छन् ।
