धनगढी : कैलालीको बर्दगोरिया गाउँपालिकाले शुक्रवारबाट शव चिस्यान सेवा सञ्चालन गरेको छ । निधन भएका व्यक्तिहरूको पार्थिव शरीरलाई केही समय सुरक्षित राख्न गाउँपालिकाले सेवा सञ्चालन गरेको जनाएको छ ।
गाउँपालिकाले सेवा सञ्चालनका लागि २ वटा विद्युतीय चिस्यान यन्त्र खरिद गरेको छ भने नागरिकहरूका लागि यो सेवा निःशुल्क हुने छ । शव चिस्यान सेवाबाट रोजगारीको सिलसिलामा देश बाहिर रहेका र आफन्तको निधनमा समयमै घर पुग्न नसक्नेहरूलाई केही राहत हुने अपेक्षा गरिएको छ ।
जनताका आवश्यकतालाई मसिनो ढङ्गले केलाउँदै काम गर्ने र नागरिकलाई सरकार भएको अनुभूति दिलाउने गरी काम गरिरहेको पालिका अध्यक्ष कर्णबहादुर कुँवरले बताए । “हामी यो शव चिस्यान कसैलाई आवश्यकै नपरे हुन्थ्यो । मानिसहरूको निधन नै नभएको हुन्थ्यो । भए पनि सबै घरपरिवार सँगै भए हुन्थ्यो सोच्छौ तर के गर्नु हामी नेपालीको बाध्यता अर्कै छ । प्राय युवापुस्ता विदेश हुने बारआमा वा अन्य आफन्त मर्दा परदेश गएकाहरूले मुख देख्न नपाउने समस्या छ । यही बाध्यतालाई हेरेर हामीले अन्तिम पटक मुख भेट गराउन चिस्यान सेवा सुरु गरेका हौ ।” अध्यक्ष कुँवरले भने ।
उनका अनुसार आवश्यकताका आधारमा चिस्यान यन्त्र थप्दै जान सकिने छ । हाललाई दोदोधारा अस्पताल मार्फत सो सेवा सञ्चालन भएको छ । आवश्यक भएकाहरूले घरमा चिस्यान यन्त्र लैजाने र पार्थिव शरीरलाई केही समय सुरक्षित राख्न सक्ने बताइएको छ । निरन्तर जनपक्षिय काम गर्दै आएको गाउँपालिकाको अर्को जनपक्षिय कामबाट गाउँवासी खुसी भएका छन् ।
यो सेवा कैलालीको धनगढी, उपमहानगर, गौरीगंगा नगरपालिका, कञ्चनपुरको कृष्णपुल नगरपालिकाले यस अघि सुरु गरेका छन् ।
