धनगढी : धनगढीको मुख्य सडक कालोपत्रे गुणस्तरहीन भएको भन्दै निर्माणमा रोक लगाईएको छ । चार पटक म्याद थपेर पनि निर्माण सम्पन्न हुन नसकेको धनगढीको (कैलालीपुल–ट्राफिक चौराहा) मुख्य सडकमा कालोपत्रे गुणस्तरहीन भएको भन्दै क्षेत्रीय शहरी विकास आयोजना कार्यालयले निर्माणमा रोक लगाएको हो ।
क्षेत्रीय सहरी विकास आयोजना कार्यालयका इन्जिनियर सौरभ कलौनीले आइतवारदेखि काम रोकिएको बताए । ‘लेयर मिलेको छैन । अलकत्राको मात्रा मिलेको छैन । मुख्यमन्त्री कार्यालयकै अगाडी सडक उप्किएको छ । त्यसैले निर्माण कम्पनीलाई पत्र नै पठाएर निर्माण रोक्न भनिएको छ’ ईन्जिनियर कलौनीले भने ।
धनगढीको कैलाली पुल देखि ट्राफिक चौक सहितका विभिन्न ८ वटा सडक निर्माणको ठेक्का चितवनको कालिका कन्स्ट्रक्सनले पाएको थियो । एशीयाली विकास बैंक एडीबीको ऋण सहयोगमा निर्माण हुन थालेको उक्त सडक २ वर्षमा निर्माण सक्नेगरी ७७ करोड रुपैंयाँमा ठेक्का सम्झौता भएको थियो ।
आयोजनाका ८ वटै सडक निर्माणको ठेक्का २०२२ को अगस्तमा चितवनको कालिका कन्सट्रक्सनले २ वर्षमा सम्पन्न गर्नेगरी ७७ करोड रुपैंयाँमा लिएको थियो । तर, ४ पटक म्याद थप्दा पनि निर्माण सकिएको छैन । उसको अन्तिम पटकको म्याद २०८० सालको कार्तिकमा सकिएको थियो । आयोजनाले फेरि अन्तिम पटक भन्दै चैत मसान्तसम्मका लागि म्याद थप गरेको छ ।
धनगढी उपमहानगरका कैलाली पुलदेखि चौराहा, सहिदगेटदेखि क्याम्पस, गुल्म चर्च सडक, क्याम्पस चोकदेखि क्याम्पस गेट, डिभोटी होटल देखि पिपलचौतरा, पिपल चौतारादेखि लवलीचोक, मालपोत रोड र ज्योती रोड गरी ८ वटा सडकको साढे १० किलोमिटरको ठेक्का एकै प्याकेजमा भएको हो । निर्माण ब्यवसायीले सहिदगेट क्याम्पस, क्याम्पस चोकदेखि क्याम्पस र मालपोत रोड कालोपत्रे गर्नेबाहेक अरु सडकमा अलपत्र छाड्दा आवतजावत गर्नेले सास्ती भोगिरहेका छन् ।
निर्माण कम्पनीले निर्माणमा चरम लापरवाही गरिरहेको सडक चैतमा पनि नसकिए उसले १० प्रतिसत जरिवाना तिर्नुपर्ने छ । जरिवाना लाग्ने डरले निर्माण कम्पनीले घाम नपरेकै बेला कालोपत्रे गरेपछि त्यसको गुणस्तर विग्रिएको हो ।
परामर्शदाता विल्डीङ डेभलवमेन्ट अथोरिटि बिडिएले मुख्यमन्त्री तथा मन्त्रीपरिषदको कार्यालय अगाडीको सडक पुनः कालोपत्रे गर्नुपर्ने भन्दै निर्माण कम्पनीलाई पत्राचार गरेको छ । क्षेत्रीय शहरी विकास आयोजनाका सबै सडकको गुणस्तर मुल्यांकन गर्ने जिम्मा विडिएको हो ।
कालिकाले निर्माण गरेका अरु सडकहरु पनि हस्तान्तरण नहुदैभत्एिका छन । सहिदगेट–क्याम्पस सडकको ठाउँ ठाउँमा सडक भत्किएको छ भने हालै कालोपत्रे गरिएको गुल्म–चर्च सडकका पनि विभिन्न स्थानमा कालोपत्रे टुटेर खाल्डा बनको छन ।
कालिका कन्स्टक्सनका प्रतिनिधि प्रकाश खरेलले गल्ती भएको स्वीकार गरेका छन । उनले रोलर गर्दा ध्यान नदिएकाले समस्या देखिएको बताए । ‘केही स्थानमा रोलिङमा समस्या देखिएको छ । अपरेटरले कम रोल गरेको पाईयो । त्यस ठाउँमा नयाँ कालोपत्रे गरिनेछ’ खरेलले भने ।
