धनगढी : नेपाल टेलीकमको तामाजन्य कवाड घोटालाकाण्डको अख्तियारले चासो लिए लगत्तै जिल्ला प्रशासन कार्यालय कैलालीले त्यसको छानविनको थप जिम्मा नेपाल प्रहरीलाई दिएको छ । कैलालीका प्रमुख जिल्ला अधिकारी धर्मेन्द्र कुमार मिश्रले थप अनुसन्धानका लागि जिल्ला प्रहरी कार्यालयलाई पत्राचार गरिएको बताए ।
विहीबार मात्रै अख्तियार अख्तियार दुरुपयोग अनुसन्धान आयोग कञ्चनपुरका प्रमुख रमेश कुमार केसीले त्यस घटनाप्रति अख्तियारले पनि चासो लिएको बताएका थिए । नेपाल टेलीकमको तामाजन्य विक्रिमा दुई ट्रकको पुनः तौल गर्दा १२ हजार किलोको घोटाला भएको देखिएको थियो । जिल्ला प्रशासन कार्यालय कैलालीले गठन गरेको छानविन समितिले गरेको दुई वटा ट्रकको तौलमा बिलमा उल्लेख भएको भन्दा ११ हजार ९५२ किलो बढी तामाजन्य कवाड बढी फेला परेको थियो ।
जिल्ला प्रशाशन कार्यालय कैलालीले प्रशासकीय अधिकृत शिवराज जोशीको नेतृत्वमा गठन गरेको छानविन समितिले पक्राउ परेका दुई वटा रा १ ख ३२०६ र ना ६ ख ४६० नम्बरको ट्रकको गत विहीबार र शुक्रबार ईलाका प्रहरी कार्यालय मालाखेतीमा तौल गरेको हो । त्यो दिनको विलिङमा १५ हजार ७७९ किलो तौल देखाईएकोमा छानविन समितिले पुनः तौल गर्दा ११ हजार ९५२ किलो बढी तौल देखिएको थियो । नेपाल टेलीकमको कबाडजन्य पदार्थमा अनियमीतता भएको भन्दै जिल्ला प्रशासनमा उजुरी परेपछि छानविन समिति गठन भएको थियो ।
छानविन समितिको निर्देशन पछि प्रहरीले दुई वटा ट्रक पक्राउ गरी ईलाका प्रहरी कार्यालय मालाखेतीमा राखेको थियो । नेपाल टेलिकमको सुदूरपश्चिम प्रादेशिक निर्देशनालयबाट तामाजन्य (स्क्रप कपर केबल) कवाडी विक्रि गरिएको हो । यसकार्यमा प्रहरीका केही अधिकृतहरु, टेलिकमका कर्मचारी र ठेकेदार कम्पनी बीच मिलेमतो भएको आशंका गरिएको छ । निर्देशनालयका अनुसार प्रबल थापाको नाममा रहेको बिएलएस कन्स्ट्रक्सन काठमाडौं नामक कम्पनीले टेलिकमको सुदूरपश्चिम प्रादेशिक निर्देशनालयसँग कपरजन्य् पदार्थको ठेक्का सम्झौता गरेको थियो ।
निर्देशनालयका अनुसार टेलिकमले उपलब्ध गराउने तामाजन्य (स्क्रप कपर केबल) कवाडी सामान खरिदकर्ता कम्पनीले टेलिकमसँग प्रतिकिलो भ्याटसहित ८ सय ५० रुपैयाँ ८९ पैसामा खरिद सम्झौता भएको थियो ।
उच्च सुरक्षा स्रोतका अनुसार प्रमुख जिल्ला अधिकारी मीश्रलाई उक्त घोटालाकाण्डमा संलग्नलाई जोगाउनका लागि चर्को राजनीतिक दबाब आएको थियो । उक्त दबाब थेग्न नसकेपछि र अख्तियारले पनि चासो लिएपछि प्रशासनले गरिरहेको छानविन प्रहरीको जिम्मा दिईएको स्रोतले बतायो ।
