धनगढीः गेटा मेडिकल विश्वविद्यालयको मागगर्दै प्रदर्शन गरिरहेका चार जना आन्दोलनकारी पक्राउ परेका छन । मंगलबार दिउसो गेटाबाट गोदावरी ५ का दिपक बोहरा र भीम बोहरालाई प्रहरीले पक्राउ गरेको थियो ।
तर मंगलबार साँझ ईलाका प्रहरी कार्यालय अत्तरियाको बाहिर सडकमा नाराबाजी गरिरहेका थप दुई जना गोदावरी ५ का भीम बहादुर बोहरा र गौतम रोकायालाई प्रहरीले कुटपिट गर्दै पक्राउ गरेको गेटा मेडिकल विश्वविद्यालय संघर्ष समितिका संयोजक लोकराज पाण्डेले जानकारी दिए ।
‘मंगलबार दिउसो २ जना साथीहरुलाई पनि कुटपिट गर्दै पक्राउ गरि जिप्रका कैलाली लगिएको छ । त्यसपछि शान्तिपुर्ण रुपमा नाराबाजी गरिरहेका थप दुई जनालाई पनि प्रहरीले कुटपिट गर्दै पक्राउ गरेको छ’ पाण्डेले भने । प्रहरीले सोमबार देखि आन्दोलनकारीहरुलाई पक्राउ गर्ने नीति बनाएको छ ।
मंगलबार विहान सरकारी गाडी बन्द गर्नेक्रममा बाँके जिल्ला अदालतको सरकारी गाडीको सिसा फुटाएपछि प्रहरीले आन्लोलनकारीलाई पक्राउ गर्ने नीति लिएको छ । प्रहरीले क्षेत्रीय बन निर्देशनालय सुदूरपश्चिम र जिल्ला अस्पताल बाँकेको गाडी तोडफोड गरिएको भन्दै ७ जनाका विरुद्ध उजुरी आएको जनाएको छ ।
दिउसो देखि आन्दोलनका संयोजक लोकराज पाण्डे, सहसंयोजक आनन्द भट्ट र सचिव धर्मसिह कुवरका घरमा प्रहरी परिचालित गरिएका छन । उनीहरु सोमबार दिनभरी प्रहरीको सम्पर्कबाहिर बसेका छन । दिउसो पक्राउ परेका दिपक बोहरालाई जिप्रका लगेर कुटपिट गरिएको र उनलाई त्यसपछि सेती अस्पतालमा भर्ना गरिएको आन्दोलनका संयोजक लोकराज पाण्डेले बताए ।
‘दिपक बोहरालाई जिप्रकाभीत्र कुटपिट गरिएको छ । उहाँको घाँटीका चोट लागेको छ । सेती अस्पतालबाट प्रहरीले फोन गरेर उपचार गराउन भनेर आफन्तलाई खबर गरेका छन’ पाण्डेले भने । प्रहरीले पक्राउ गरेपछि हिरासतभीत्र कुटपिट गरेको घटनाको राष्ट्रिय मानवअधिकार आयोग, ईन्सेक र पत्रकारहरुले अनुगमन गरिदिन आग्रह समेत गरेका छन ।
‘कुनै अपराध गरेको छ भने त्यसमा कानूनी कारवाही होला तर प्रहरी हिरासतमा लगेर कुटपिट गर्ने काम भएको छ । संघर्ष समिति त्यसको निन्दा गर्दै छानविनको माग गर्दछ’ संयोजक पाण्डेले भने ।
तर ईलाका प्रहरी कार्यालय मालाखेतीका प्रहरी नायव उपरिक्षक गणेश बरालले भने पक्राउ पछि कसैलाई कुटपिट नगरिएको प्रतिक्रिया दिए । उनले दिपक बोहरा र भीम बोहरालाई सरकारी गाडी तोडफाडको जाहेरीका आधारमा सोधपुछका लागि पक्राउ गरिएको बताए ।
साँझ पक्राउ गरिएका भीम बोहरा र गौतम रोकायाले प्रहरीसँग ज्यादती गरेकाले पक्राउ गरिएको बताए । ‘दुबै जनाले मादक पदार्थ सेवन गरेका थिए, चेकजाँच गर्दा मापसे देखिएको छ । उनीहरुलाई केही प्रकृया मिलाएर मंगलबार छोडन सकिन्छ’ डिएपी बराललले भने ।
